"دئمرم"

سو ايچنده ذوق ائدرم داد وئرمز آغيزيمدا آب

سرين له سم كؤلگه ليكده دا سايه بان دئمرم

دريالاردا گمي لري گزديرر گميچي لر

چوخ گؤزل دير گميچي ليك دا كشتيبان دئمرم

ائو -ائشيگيم ايشيقلانار قوناقلاري گؤرنده

من قوناغي چوخ سورم آما مهمان دئمرم

آنام منه دون تيكيردي سيريق-سيريق آرخاديق

كؤينگيمين اتگينه داحي دامان دئمرم

اول ائوده اوشاقلارا تورك ديليل اؤيره درم

آنايا آنا دئيه رم دا مادرجان دئمرم

بير گؤزلي تعريف ائتسم توركجه سؤز قوشارام

كيرپيگين اوخ قاشلارين ياي،ابرو كمان دئمرم

بئشيگينه گهواره دئمم او مني ييرقالاييب

صوبحه كيميگودوكچويه من نگهبان دئمرم

قونشويا همسايه دئمم من يولداسا دا همراه

اوغولا اوغول دئيه رم هئچ پسرجان دئمرم

اكيچي يم يوخ كشاورز،تورپاغا خاك سؤيله مم

اولدوزا ستاره دئمم گؤيه آسمان دئمرم

گؤي گورولدار،ياغمور ياغار،ياشيل لانار يايلالار

هر نه قدر ياغيش ياغسا اونا باران دئمرم

دگرلي يه دگر وئرره م ارزشدن چيخماز باشيم

اوجوزا اوجوز دئيه رم داحي ارزان دئمرم

ْآتا-بابام تورك دور منيم توركجه دانيشارام

فارسي دا خوش شيرين ديل دير خوشا يامان دئمرم

دده كاتب تورك اوغلويام چوخ دالي دير ديليميز

ماهي يه باليق دئیه رم سونا پايان دئمرم