| تبليغات | X |
دده کاتیبین اینجی لی صدفیندن
آذربایجان اوغلویام
یارادانا شوکر ائیلرم من مسلمان اوغلویام
دیو-اجنّه دگیلم ، بلکه انسان اوغلویام
ذاتیم دوغرو، سودوم دوغرو عقد صحیح اولادی
دوز نطفه دن دوغولموشام حکم قرآن اوغلویام
اساس سویوم تورک دور منیم من اوغوز نسلیندنم
شکّ شبهه یوخوموزدور یوزد ه یوز نسلیندنم
افتخارلی آذر بایجان دوغرو - دوز نسلیندنم
سؤز اوستادی دده قور قوت عین اوز نسلیندنم
سانلی –شانلی تاریخیمیز دوغرو باستان اوغلویام
آذربایجان بئشیگنده قهرمانلار بسلنیب
شاعرلری سانا گلمز غزلخوانلار بسلنیب
آدی بللی باغیر خانلار ، ستار خانلار بسلنیب
دشمنه دال دوندر مه ین قوچ اوغلانلار بسلنیب
یاتمام تولکی دالداسیندا ، ارکک آسلان اوغلویام
دده کاتیب بیر رنگیم وار هر رنگه بویانمارام
ملّتیمی تعریف ائتسم اؤلونجه اوسانمارام
آذربایجان تورک اوغلویام ذاتیمی خوارسانمارام
پارچا –پارچا دوغراسالار اؤزلوگومو دانمارام
مسلمانام ، تورکم ، آذربایجان اوغلویام
کراسون قیزی
کراسوندا بیر قیز گوردوم
گزر ساللا نا ساللانا
سانکی بیر سونا گاز گوردوم
اوزر ساللانا ساللانا
کینا یاکمیش ال لرینه
حایران اولدوم دیل لرینه
آلتون میخک تئل لرینه
دوزر ساللانا ساللانا
کیزیل غنچه یاز چیچگی
بودور گوزل لر گویچگی
ساچلارین هندین ایپگی
بزر ساللانا ساللانا
دده کاتب گورسون گوزون
مصرده زلیخانین اوزون
قاش آلتیندان خومار گوزون
سوزر ساللانا ساللان
خبرين وارمي؟
گئجه-گوندوز خلقه ايراد ائد نلر
هئچ اؤزون اؤزوندن خبرين وارمي؟
قونشونون گؤزونده قيلي گؤرنلر
بير باخ اؤز گؤزوندن خبرين وارمي؟
مؤمون قارداش هئچ بيليرسن نئديرسن؟
ايشين بودور خالقين عيبين گودورسن
بئش قدمده دؤردون اَيري گئديرسن
بير دؤن باخ ايزيندن خبرين وارمي؟
حرام مالدان فاخير ليباس گئييرسن
آغيز سيلمك نه دير؟! موردار يئييرسن
آشيغين سازينا حرام دئييرسن
اؤز ساختا سازيندان خبرين وارمي؟
دده كاتيب سن ده بير بيل حسابين
دوز عملين آزدير چوخدور خرابين
قورخ او گوندن اوخوناجاق كيتابين
دئدييين سؤزوندن خبرين وارمي؟
منه نئيلر؟
حيكمت عالميندن دؤرد سؤز اؤيرنديم
آرتيق درده دَيمز سؤز منه نئيلر؟
بيردن باشلاميشام بيرده دورموشام
يئتميش، سكسن، دوقسان، يوز منه نئيلر؟
حياتدا چارپاشيق يوللار كئچميشم
اوّل آختارميشام اوّل سئچميشم
عشقين آتشينه يانيب پيشميشم
اود اودو يانديرماز كؤز منه نئيلر؟
باطيل بئش گؤن اوينار دوشر اثردن
حقيقت شمشيري دؤشمز كسردن
يارادان سالماسين مني نظردن
قوْي باخسين بد نظرگؤز منه نئيلر؟
دده كاتيب الهام آلار اوزاقدان
يولداش اولمام من قورخارام قورخاقدان
درباري لر قورخار توزدان، تورپاقدان
اكينچي اوغلويام توز منه نئيلر؟
يالان دونيا
چوخ اويونلار سنه يارار
يالان دؤنيا دئييل ميسن؟
دون بوْشاليب بو گؤن تكرار
دوْلان دؤنيا دئييل ميسن؟
دَيير مانسان اينسانلارا
قييارسان دادلي جانلارا
اجل بومباسين خانلارا
چالان دونيا دئييل ميسن؟
آتش اوجاغين قوراندا
آجيق تكمه سين ووراندا
قهرمانلاري يوراندا
گولن دونيا دئييل ميسن؟
دده كاتيبين سسينه
چولقالادين غم سيسينه
سوندا اؤلوم قفسينه
سالان دونيا دئييلميسن؟
وطنه دوغرو
قادر آللاه هر نه آخير نفسده
اوزونو دؤندرر وطنه دوغرو
بولبول چهچه وورار باغلي قفسده
اوزونو دؤندرر وطنه دوغرو
حسرت عاشق دردي- دلين آچاندا
آزغين مارال داغدان داغا قاچاندا
كؤچمن قوشلار قاناد چاليب اوچاندا
اوزونو دؤندرر وطنه دوغرو
يئرلي قارغا قاريلداييب گولنده
غريب ترلان باغرين باشين بؤلنده
غريب شاهلار تخت اوستونده اؤلنده
اوزونو دوندرر وطنه دوغرو
دده كاتيب عؤمرون گونو باتاندا
قوهوم- قارداش، ائل داشيمي آتاندا
غريب آسلان ياتاغيندا ياتاندا
اوزونو دوندرر وطنه دوغرو
شاعیر : قولونجولو دده کاتیب ( حاج عبدالرحمن طیار )Dede Katib
