(بو یازی ،اسفندیار سپهری،صاباحیمیزهفته لی یی نین یازیجی سینین سیته سیندن گؤتورلنیب)

جومه گونو بایرام آیی نین 23- جو گونونده پیغمبر جنابلارینین دوغوم گونلری له یاناشی آخشام چاغی ساهات 4- دن 6- یا چاغ دده کاتیب رحمت لی یین آنا یوردو و دوغوم کندی یانی قولونجو کندی نین سوننولر مچیدینده نورلا قبری دولو اولانین عبدالرحمان طییار عصریمیزین دده قورقودو ائلیمیزین ادب قایناغی یوردوموزون دین جل عالیمی و خالقیمیزین و اؤزللیک له  تورک دونیاسی نین کولتور دده سی نین کولتوردده سی نین عزیزلندیرمه  قورولتای یی قورولدو. بو قورولتای دا ادب سئور اینسانلار یوردوموزون یاخین و اوزاق ب‍ؤلکه لریندن و اؤزللیک له باتی آزربایجانین شاعیرلری ، یازیچیلاری ، آشیق لاری ،  بسته کارلاری  ، ادیبلری ، اینجه صنت چی لری و تامامیله اونون ایستی ین لری حاضیر اولوب و او قوچامان شاعیرین اونودولماز آدین و یادین دیه رلندیردیلر.عجبا نی یه بو قورولتای سه سیز و صداسیز و تکجه اورمیه شهرینده او رحمت لی یین عزیزلندیرمه سی و اودا ان آز یئرلرده تبلیغات اولوندو منه بیر اؤنملی سورودور. آمما نی یه بو قورولتایا منیم تنقیدیم وار سببین سیز حؤرمتلی یوردداشلاریما ایضاح ائدیرم.بیلیرسیز کی بیزیم ایران اؤلکه میزده تأسسوفله بئله رسم اولوب و یئرینه دوشوب کی اینسانلار اؤزللیک له شاعیرلر، عالیملر ، موغننی لر ، یازیچیلار ، سیاست چی لر ،  کولتور و ادب چی لر ، اینجه صنت چی لر ،  عدالتسیز لیک له موباریزه آپارانلار وحتتا آتا آنالار و باشقا اینسانلار نئجه کی یاشایئش حالیندادیرلار و تخصصوصه مالیک اولان قونولاردا فاعالییت گؤستریرلر یادا دوشمه ییب و بیر کس ده اونلارین کئفلرین و نه کؤهده عؤمور سورمکلرینی سوروشمورلارهئچ هه له هردنده ائهانت ائدیب و اذییت ائدیرلر. آمما ائله کی بو قوچامان اینسانلارا بیر قولای و کدرلی اولای ال وئریر یا دا  یاتار حالا دوشوب و خسته خانا قاپیلاری اونلارین اوزونه آچیلیر و بونلاردان اؤنملی دونیالاری ده ییشیلیر یادا دوشورلر

دده کاتیب ده عصزیمیرین دده قورقودو، آدلی سانلی و ابدی یاشار قوجامان خالق شاعیریمیزشعر مولکونون سولطانی محممد حوسین شهریار کیمی دونیادان کؤچندن سونرا عزیزلندیرمه قورولتایی توتولور. بیر آز چکمییه جک کی شهریار کیمی اونادا دفه لرجه مراسیم توتوب فخره مالیک اولان اینسانین آدی و پیکره سی هر بیر شهه رین خیاوانلارینین و مئیدانلارینین به زه یی اولوب و شکیللری چکیلیب و نئچه نئچه کیتاب و مقاله یازیلیب و یاییلاجاقدیر. شوبهه سیز بونلار اولو اینسانلرین دیه رلندیرمه سینه چوخ لازیمدیر و بئله اینسانلاری دونیایا تانیتدیر ماغا  اؤنملی گؤستریشدیر.آمما ندنسه اونلارین دیرلیق زامانیندا بئله بیر ایشلر گؤرولمور منه بیر اؤنملی و عئینی زاماندا کدرلی قونودور. عجبا نییه بئله بیر قیمتلندیرمه لر دونیانین باشقا یئرلرینده اوز وئرمیر به للی دئییل؟

بلی ؛ بیزیم اؤلکه میزده اینسانلار گؤزلرین یوموب و تورپاغا تاپشئراندان سونرا یادا دوشوب ، و یوکسک سوییه ده قورولتای قوروب و دیه رلندیریلیرلر، اونلارین مدحینده شعرلر دئیلیب ، سؤزلر یازئلیب ، پیکره لر یونتولانیب ، رسیملر چکیلیب ، کیتاب لار یازیلیب وتامامیله دونیایا جار سالینیب و آدلاندیرارلار.

آمما ندنسه اونلارین دیریلیک چاغیندا بئله بیر عزیزلندیرمه ایشلر و فاعالییت  گؤرون مور؟ بونا گؤره دیر کی بیزه" مورده پرست " یا خود اؤلو پرست آدین قویوبلار؛ و منجه دوز سؤزدور.

دده کاتیب دئمیش :

عزیزیم قارا باغلار                یار یارا یارا باغلار

ساغلیقدا قدرین بیلمز        اؤلنده  قارا  باغلار

بلی ؛ دده کاتیب رحمت لیک 84 یاشیندا دونیاسین ترک ائتدی. او رحمتلی یین عؤمرونون یئتمیشدن آرتیق فاییزی ، ادب ، کولتور ، شعر و  دین ساحه سینده و ها بئله بوتون خالقی بیرلی یه   چاغیرماق و آیری اولماماقا دعوت ائتمکده کئچدی. او اوجامان شاعیر جاوان و گنج چاغلاریندا اؤزو دئمیشکن مجازی عئشقیدن حقیقی عئشقه اوز گتیردی و اولو قورآندان ایلهام آلیب عیرفانی و اونلا یاناشی سوسیال و اینتیقادی شعرلر  سویله ییب و و یوکسک سوییه ده فاعالییت گؤستردی. او دونیادان کؤچه نه کیمین ، خالقین قوللوغوندا اولوب و زمانه نین سئخئنتیلیغینی و ساتقینچی و آیریلیق سالان آداملاری  گؤروب اونلارلا شعر قالیبینده موباریزه آپاردی.

اینانین او ابدی یاشار اینسان قیمتلی و دیه رلی شعره عایید اثرلرینی کیتابا چئویرمکده و خوصوصی له اونلارین یایماغیندا و حتتا ساتیشیندا چوخلو چوخلو اذییت لر چکدی.هئچ بیر دؤولتی ایداره اونا و اثرلرینه صاحاب چئخمیردیلار.

ایندی ایسه ندن او دونیادان کؤچندن سونرا یادا دوشور و اؤز دیلیمیز خالا خاطیری قالماسینا گؤره قورولتای قوروب وقیمت لندیریرلر من کی بیلمیرم.

سؤزومون سونوندا صیاد گلی پور (آغجا اوغلان ) جنابلارینین دده کاتیبه ائتحاف ائتدیی دیه رلی شعرین گتیریرم :

ائلیمین  اوبامین   قوجامان اری            اؤلکه مین سلطانی دده کاتیب دی

باخجامین بولبولو باغیمین باری            دیلیمین باغبانی   دده کاتیب دی

تاریخلرکؤک سونده قالاجاق آدی        داغلارین آسلانی داشلار  فرهادی

قوشمالار گؤزه لی سؤزلرین دادی       شعرین ایستی قانی دده کاتیب دی

آسلانیم  یاتماییب   هله  اویاقدی            بو اولو ائلیمه  بؤیوک  دایاقدی

سؤز مولکونده سؤزو شیرین بولاقدی      بولودون نیسانی دده کاتیب دی

بو شیرین بو دادلی دیلیمدن یازان       بو قوچاق غیرتلی ائلیمدن یازان

قافلانلار بؤیودن چؤلومدن  یازان         یوردومون اسلانی دده کاتیب دی

گؤیومون اولدوزو  چؤلومون یازی          آشیقلار الینین  دانیشان سازی

چیرپینان اوره گی آغزینین سؤزو        تاجری  دیوانی   دده کاتیب دی

سکسان بیر یاشیندا گؤزل آتامیز         ارنلر  هوشوندا  گؤزل   آتامیز

اوستادیر ایشینده  گؤزل  آتامیز          قوشمالار اورمانی دده کاتیب دی

بیر اولو کیشیدی بو شیرین عمی         غیرتلی  ائلینین چؤلونده   زمی

دالقالار اوستونده ییرقانان گمی           دنیزلر  توفانی   دده کاتیب دی

دایاز گؤلچه دئییل دریندی درین         تورک اوغلودو تورکی دئییبدی شعرین

داغلارزیروه سینده سالیبدی یئرین     زیروه لر  ترلانی   دده کاتیب دی

آغجااوغلان اوخویورشعریوی دیلده    مین اوچ یوز بو سکسان بئشینجی ایلده

دوغوردان عطر وار سن قیزیل گولده      ائلی نین غزل خوانی دده کاتیب دی

ایضاح ائتمه لی یم کی بو شعر رحمتلیک دده نین سکسان بیر یاشیندا اولان زامان اوخونوب و دده یه ایتحاف اولونوب

http://www.qarapapaq.blogfa.com/post-40.aspx