| تبليغات | X |
دده کاتیب دان ، داها آرتیق شعیرلر
(اینجی لی صدف و گونوموز آیدین ، کیتابلاریندان)
گونوموز آیدین کیتابیندان
ها!
بئش گون گن دونیایا آلدانما کؤنول
بئش گون سونا چاتار دؤوره دؤنر ها
دئمه قامتیم دوز بئلیم گوجلودو
یوکون آغیرلانار بئلین سینار ها
اوجا اوچما دئمه من قانادلیام
اوجادا اوتوروب یئددی قاتلیام
پیاده یه گولمه دئمه آتلیام
نوبه چاتار دای بابانی مینر ها
دوغرولوق بوکونون آلتیندان قاچما
امانت کیمسه نین سیررینی آچما
اؤزوندن ضعیفه چوخ اسیب جوشما
قازان چوخ قایناسا دیبی یانار ها
دده کاتیب کیم کام آلیب جهاندان
عارف اولان عبرت آلار زاماندان
وار گونونده بهره گؤتور تواندان
اجل قوشو کؤکسون اوسته قونار ها
دوغرو موسلمان
یارادانا شکر ائده ریک دوغرو موسلمان بیزیک
الست گونو بلا دئدیک هم اهل ایمان بیزیک
تورک اوغلویوق تورک تورونو یوردوموزو سئوه ریک
یوردومون دوستونا دوست دوشمانا دوشمان بیزیک
اوغوز، بابک، کوراوغلونو خاطرده ن آتماریق
دده قورقود اؤیودلرین هئچ وقت اونوتماریق
مردلیک ایله شاواشیق دالدالانیب یاتماریق
تولکولره باش اگمه ین بیر باش اسلان بیزیک
بوتون دونیا تاریخینده دوشماندان باج آلمیشیق
آلچاقلارا اگیلمه میش هر زامان اوجالمیشیق
دوشمانلار بؤیله سانماسین سارسیلیب قوجالمیشیق
تلاطمی دنیز کیبی دالقالی توفان بیزیک
تاریخلری ورق وورساق آألی سانلی شانلی ییق
آغری داغین زیروه سی تک هر زامان دومانلی ییق
آذربایجان بالاسییق ایستی غیرت قانلی ییق
یئددی اقلیم تانیر بیزی دیل لرده داستان بیزیک
دده کاتیب بیر اوزلویوک سویوموزو دانماریق
اؤز سویونو دانانلاری اصلا انسان سانماریق
دین ائیله وطن اوغروندا جان وئرریک اوسانماریق
قورخو بیلمز تورک اوغلویوق بیر قیزمیش قاپلان بیزیک
دوز انسان
یارادانین قدرتینه چوخ شکور
آدام یارانمیشیق دوز انسان بیزیک
موحدیک لا اله ال الله
محمد امتی، مسلمان بیزیک
تورک اوغلویوق دالدالانیب سینمیریک
دوشمان قارشیسیندان گئری دؤنمریک
بیر قیزقین آتشیک تئز-تئز سؤنمریک
قارتال اوچوشلویوق ار اسلان بیزیک
اساس تورک اوغلویوق ایچ اوغوز خانلی
قوچاق نبی بابک بایاندیر خانلی
دین وطن اوغروندا قورخماز ایمانلی
ساواش میدانیندا بیر قاپلان بیزیک
دونیا بویو وورولمامیش وورموشوق
سویوموزدا ثابت قدم دورموشوق
اون سگگیر امپراطورلوق قورموشوق
گئری دؤنمز بیر مرد میدان بیزیک
آذربایجانلی ییق بیلسین دونیالار
دنیزلر ، قارالار ، یئرلر ، هاوالار
گورولتو سالاریق قورخار دریالار
داغلار زیروسینده بیر دومان بسزیک
دده کاتیب دوغرو یولدان چیخماریق
هئچ کیمسه یه پیس گؤز ائیله باخماریق
دوغرو تورکوک یاخماسالار یاماریق
هر زامان مطیع القرآن بیزیک
ساویشماز
گئنه کؤنلوم دوشدو یار سئوداسینا
بلا هاردا اولسا مندن ساویشماز
من عاشقم ساویشماز
بلا مندن ساویشماز
بو عادت دیر عاشیق لرده آختارار بلا تاپار
عاشق لردن درد و بلا ساویشماز
هر طبیبه دردین آچماز دال با دال
عاشق اولان معشوقوندان یارالی
یار ووروبدور یارام واردیر یارالی
من عشقم یارالی
یار گئیینیب یارالی
شیدا بولبول ناله چکر خار الیندن آه و واه
یارالیام یارام باغلار یارالی
خنجر ووروب داها دئشمز دال با دال
شاعیر هردن تجنیس اوخور جیغالی
قابل خیاط دونو تیکر جیغالی
عاشق اوخور جیغالی
دیوان تجنیس جیغالی
قناره لر باهار چاغی بوداق اوسته فغاندا
یار زولفونو یارداراییب جیغالی
اؤزگه لره اوزون آچماز دال با دال
دده کاتیب سؤزون سؤیلر دلیندن
اول اوره گینده سونرا دیلیندن
عزیزیم دیلیندن
عاشق اوخور دیلیندن
دیل خطردی عاقل انسان خوش دانیشار خوش دئیه ر
خلقی سانجاماز اؤزون قورور دیلیندن
هر نه گلدی ها دانیشماز دال با دال
آغلادی
قادر آللاه بو محنتدن بو غمدن
یاندیم جسم ایچینده جانیم آغلادی
پروانه تک آلیشمیشام آتشه
قایناییب جسدده قانیم آغلادی
سگگیز سجده گاهیم بیر یانا دؤندو
بئش جسمیم اعضادا دیوانه دؤندو
قلبیم قانا گؤزوم عمانا دؤندو
ایکی عینیم بیر زبانیم آغلادی
اود آلیب آلیشدیم اوره کده ناریم
گئجه گوندوز بیر آللاهه بالواریم
بوتون اوچ یوز آلتمیش داماریم
دؤرد یوز قیرخ دؤرد استخوانیم آغلادی
کاتب بیر آللاهه واردی پناهیم
بایقو تک ویراندا کیم بیلیر آهیم
دنیزلر جمع اولسا چوخدو گوناهیم
یاد ائدینجه روح روانیم آغلادی
کوراوغلو
ایسترم مردلری تعریف ائیله یم
مردلرین سولطانی قوچ کوراوغلودو
شهرتی یاییلیب توتوب هر یانی
ایگیدلرین خانی قوچ کوراوغلودو
عؤمور بویو مردلیک ائیله ساواشدی
نامردی اؤلدوردو مرددن ساویشدی
شجاعت مولکونه دوغرو یول آشدی
شجاعتین کانی قوچ کوراوغلودو
صحبتینین آغیزلاردا دادی وار
آشیقلارین مجلیسینده یادی وار
تاریخده ن سیلینمز گئتمز آدی وار
ارکک لیک نیشانی قوچ کور اوغلودو
کور اوغلو تک ار اوغلانلار وار اولسون
نامردلرین کؤنلو آه و زار اولسون
کوراوغلویا پیس دئیه ن لر خار اولسون
نامردلر دوشمانی قوچ کوراوغلودو
کوراوغلو تورک ایدی بیر اوغوز خانی
تورک لره قازانییب شوکتی شانی
چاملی بئلده قالیر یوردو نشانی
دیل لرین نشانی قوچ کوراوغلودو
دده کاتیب حئیف مردلر کؤچ اولدو
حسرتیمیز آرتدی ایکی اوچ اولدو
قوچ دوغولدو قوچ یاشادی قوچ اولدو
اسلانلار اسلانی قوچ کوراوغلودو
نه عادت دیر؟
قادر آللاه نه عادت دیر زاماندا؟
یوخسو لون دوز سؤزون هئچ کس حاقلامیر
نه قوهوم نه قارداش نه ده قونشولار
ایل لر دؤنور بیر-بیرینی یوخلامیر
مؤمن قارداش هردن تویا گلنده
مین لیک سپیر تویچولاری گؤرنده
اون بئش تومن مستحققه وئرنده
سانجی توتور صبحه کیمی یوخلامیر
علم مجلسیندن دولانیر اوزاق
معنالی سؤزلرده اولوبدور قاچاق
معناسیز سؤزلره قوچ اوغلو قوچاق
انگی برکدی ها دانیشیر لاخلامیر
دده کاتب اگری یولدان قئییدر
فلک دییرماندی خاقی اویودر
بیر آتا بیر سورو اولاد بؤیودر
سگگیز اوغول بیر آتانی ساخلامیر
سئوه رم
عاشق اولدوم بیر دلبرین یولوندا
دل وئرمیشم من دلداری سئوه رم
آنلایانلار ایچدی ادب جامینی
او سببدن خوش گفتاری سئوه رم
بیر گونوم جاواندی بیر گونوم قوجا
بیر گونوم آلچاقدی بیر گونوم اوجا
یاردان غیریسینه ائتمم ایلتیجا
من عاشقم آنجاق یاری سئوه رم
انسان گرگ ناموسوندان اوتانا
لعنت گلسین دوستا یالان ساتانا
نامرد ائیله بیللاه گئتمم گولشانا
مرد ائله آتشی ناری سئوه رم
سیز بیر باخین بو زامانین گردینه
نامرد شریک اولمور مردین دردینه
من کاتیبام مایل اولدوم دؤردونه
هر کس بیلیر چهار یاری سئوه رم
بوکولموشم
غنی مولم غم چکمکدن یوکولموشم بوخچالاردا
کرکس لر ال بیر اولوبلار منه گولور زاغچالاردا
سیزیلدارام کاباب کیمی بیر سؤالسیز جواب کیمی
اوخونمایان کیتاب کیمی ترک اولموشام تاخچالاردا
آنادان دوغدوم دوغولو سؤزوم سینمده بوغولو
نئیلیرم اون بیر اوغولو تک قالمیشام کوخچالاردا
دده کاتیب یامان اولودوم بوی بوکولدو کامان اولدوم
سون عؤمرومده چوبان اولدوم تک یاتیرام باخچالاردا
یئمک لرین تزه سی دئمک لریم مزه سی
صاباح چاغی بئش گؤزه له اوغرادیم
تپره نیر کؤکسونده نار گوله گوله
بیر قیزیل قونچادی یاز چیجگی دی
یاشیل بوداق اوسته یار گوله گوله
عاشق اولدوم سن گؤزه له گول گوله
قاش اوینادا کیپریک وورا گول گوله
بورون فیندیق دوداق گوله گول گوله
بیزه قوناق گله یار گوله گوله
بویون سرو هیندی یاناغین لاله
گؤزلرین گؤرندن ایستیر جان آلا
حسرتین کؤنلومده قالا ها قالا
سالدین اوره گیمه نار گوله گوله
دده کاتیب گئنه آرتدی حسرتین
گؤزه لدن آیریلماق چتین دیر چتین
دئدیم بیزه مئیلین بس محبتین
گولو مسنیب دئدی وار گوله گوله
عرفان عالمینده
عیرفان عالمینده اینسان ایچینده
هئچ زامان یاخشییا یامان دئمزلر
اخلاق دفترینده قرآن ایچینده
ریاکارا اهل قرآن دئمزلر
انسان اودور بوش دورماسین چالیشسین
عاشیق گرک عشق اودونا آلیشسین
بیر انسان کی هر نه گلدی دانیشسین
حیاسیزا اهل ایمان دئمزلر
انسانلارین وفالیسی یاخشی دیر
آینالارین شفافلیسی یاخشی دیر
اوغرونوندا اینصافلیسی یاخشی دیر
اینصافسیزا صاحب وجدان دئمزلر
دده کاتیب بو جمله یه خوش اینان
ایمانین خرمنین یاندیرار یالان
وارلیا دوست اولان یوخسولا دوشمان
هئچ قانوندا اونا اینسان دئمزلر
اؤلندن سونرا
کؤنول کیمیادیر عؤمرون باهاری
سولاجاق بو داقلار اؤلندن سونرا
فرصت گئتسه حسرت بره باغلاماز
بیرده دؤنمز ساغلار اؤلندن سونرا
دم غنیمت،چالیش قازان ساغ ایکن
آتشی سؤندورمه قازان داغ ایکن
دیء دانیش دیل دوداق داماق ساغ ایکن
باغلانار دوداقلار اؤلندن سونرا
آدام وار دادماییب دوستلوق شربتین
وقتی بیلمز الدن وئرر فرصتین
ساغلیغیندا بیلمز دوستون قیمتین
افسوس ائیلر آغلار اؤلندن سونرا
دده کاتیب هئچ قورتماز دیدهسین
کیم ساغالدار اوره گینین زده سین
اوغول واردیر هر گون دؤیر دده سین
اوچ آی قارا باغلار اؤلندن سونرا
اوغول اؤلومو
مدد سندن ای جان وئریب جان آلان
صبر ائیله ین مصیبته دایانار
هر آتشه بیر سو سپسن او سؤنر
قارداش اودو سؤنمز یانار ها یانار
اوغول اوره کدن دی یاخار اوره گی
قبول اولسون اوغولسوزون دیله گی
قارداشی اؤلنین یانار دیره گی
دیره کسیز خانه سی یانار ها یانار
اوغلو اؤلن آنا سیلمز گؤز یاشین
باجیسی قاردان آییرماز باشین
بیر ایگیت کی الدن وئرسین قارداشین
بئلی سینار ناله چکر ها یانار
کاتیب سئور اولوسونو ائلینی
تک لیک لال ائلییب دئیه ن دیلینی
اوغول دردی بوکر آتا بئلینی
قارداش اودو شعله چکر ها یانار
زمانه
قادیر آللاه بد زامانین الیندن
گونو گوندن ایشلر دوشور یامانا
آنلایانلار آغلیر قانمازلار گولور
گؤروم دگیشلنسین تئز بو زامانا
محبت آزالیب سویویوب قانلار
جسد لر یارالی ، سیزلاییر جانلار
شهرت اولوب عیبادتلر احسانلار
ایشیق گونلریمیز دؤنوب دومانا
بوتون ایشلریمیز اولوب اویونچاق
اوزلولر اوزده دیر دالدا اوتانجاق
گئچی لر قویونا دئییر تومانچاق
تومانچاقلار گولور کؤهنه تومانا
دده کاتیب بودور سؤزله رین دوزو
دوغرو نطفه لرین بیر اولار اوزو
قانماز دوستون ایکی یوزو، اوچ یوزو
قوربان اولسون بیر آنلیان دوشمانا
اینجی لی صدف کیتابیندان
اؤز دیلیمیز
گل یولداش اؤز دیلیمیزده دانیشاق
اؤزگه دیلی دیلیمیزه قاتمایاق
تورکوجه سؤیلویک هر نه یین آدین
دده-بابا یولوموزو آتمایاق
چوخ گؤزللیک واردیر بیزیم ائللرده
یازیلار یازیلیب واردیر ال لرده
بابالاردان قالیق قالیب دیل لرده
اؤلوب گئتسک ائلیمیزی آتمایاق
اونوتمایاق یوردوموزون امگین
سوس لندیره ک اؤلکه میزین چیچگین
برکیده ک اؤز ائویمیزین دیره گین
یابانجیا سؤزوموزو ساتمایاق
دده کاتیب دگرلی دیر دیلیمیز
آدلی سویوموز وار گوجلو قولوموز
اسگیدن توتموشوق دوزدور یولوموز
آییق گئده ک یولوموزو یاتممایاق
غفلت
اؤزون داده یئتیش یارادان آللاه
گوجدن دوشدوک قدرتیمیز قالمادی
مین دؤرد یور ایل شهرتیمیز واریدی
ذلیل اولدوق عزتیمیز قالمادی
دوستلاری اونوتدوق دوشمانی توتدوق
یولداشی بوراخدیق اویناشی توتدوق
بیرلیک آغاجینی کؤکدن قوروتدوق
دامارلاردا غیرتیمیز قالمادی
دامارلاردا ایستی قانلار آخاردی
قیلینجیمیز شیمشک کیمی چاخاردی
هر دؤرد طرف گوجوموزدن قورخاردی
هئچ زاد اولدوق هیبتیمیز قالمادی
دده کاتیب بیزی پوزدو بو غفلت
دیلده داد قالمادی آغیزدا لذت
خوش جمله دیر معلول اولماز بی علت
علت بودور وحدتیمیز قالمادی
بیزیم دگیل
قادر آللاه بو نه شوردور زاماندا
باخچا بیزیمکی دیر گول بیزیم دگیل
سن بؤلن بولگولر قبول اولمادی
پتک بیزیمکی دیر بال بیزیم دگیل
باهار چاغی گؤی گئیینیر صحرالار
ذوقا گلیب دالغا وورار دریالار
یاغمور یاغار یاشیل لانار دریالار
یایلا بیزیمکی دیر ائل بیزیم دگیل
قوردا یول وئردیلر خایین چوبانلار
خارا یولداش اولدو ناشی باغبانلار
اود آلیب معدن لر آلیشدی کانلار
معدن بیزیمکی دیر لعل بیزیم دگیل
نه طوفان دیر نه غوغادیر نه دومان
آتش آلیب خرمنیمیز یان ها یان
دده کاتیب دیلین ساخلا،دور،دایان
اوره ک بیزیمکی دیر دیل بیزیم دگیل
اوچ ها اوچ
ده لی کؤنول چوخ آه و زار ائیله مه
پروار ائله غمخانه دن اوچ ها اوچ
دردین اولسا آلچاقلارا سؤیله مه
بیر دردین آرتیرار ائیلر اوچ ها اوچ
مرد اوغلانلار هر زامانلار مرد اولو
یئمه نامرد لقمه سینی در اولو
قورد بالاسین هر نئیله ین قورد اولو
اصیل قوچدان قوچلوق اولار قوچ ها قوچ
خسیس لرین دویماز گؤزو دار اولار
الدن یاپیشانا مولا یار اولار
شورا یئرده بوستان اکمه خوار اولار
سعیین باتار توخمون اولار پوچ ها پوچ
دده کاتیب چاغیر شاه ذوالکرم
حقینه قانع اول چکمه درد-غم
پیس قونشونون قونشولوغون جهنم
یوکون یوکله جهنمدن کؤچ ها کؤچ
نه زامان گله جک؟
قادیر آللاه در وئریبسن در مان نه زامان گله جک؟
قطره لر قاتیب حالیمی عمان نه زامان گله جک؟
عمان دالغادا،سسده دیر کؤنول زیندان،قفسده دی
بوگون فرصت کرکسده دیر ترلان نه زامان گله جک؟
ترلان دوشوب توردا قالدی کلیم الله طوردا قالدی
سیف آیه سی هاردا قالدی فرمان نه زامان گله جک؟
قرمان گلسین گؤزوم در ده فاتح فتح خیبرده
دده کاتیب دولوب درده لقمان نه زامان گله جک؟
سن ده گول
ده لی کؤنول چوخ ائیله مه آه و زار
یاز آچیلیب گوللر گولور سن ده گول
صبح آچیلدی ظلمت اولودو تار و مار
سولار جوشوب سئللر گولور سن ده گول
بنؤوشه باش وئریب بویاندی لاله
ساقی لر الینده گزیر پیاله
رقیب لر گؤرونجه دوشدو خیاله
جهان شاددیر ائل لر گولور سن ده گول
سرو سایه سالیب قمر اولدو شق
عندلیب دیل آچیب اوخور هوالحق
مشاطه لر نوردان چکیبدیر بیدق
مشاطه گول،تئل لر گولور سن ده گول
دوستون باغچاسیندا بولبول غزلخوان
ارغنون عرشده اوخویور سبحان
کاتیب غصه لنمه الحکم قرآن
حقی دئیه ن دیل لر گولور سن ده گول
بو شئعیرلری چاپ اولونمویوب
بو، لاب آخیر شعیرلردن دیر(کی عؤمرونون دوشگون لوق و قوجالیق زامانینا دئییب)
مدد آللاه دوشگون لرین یاوری
دوشگون اولدوم دوشدوم اللرده فالدیم
عومور دولدو سیننیم سکسان اوچ اولدو
دوشدوم غم گؤلونه سئللرده قالدیم
الیف قددیم دؤندو نونا بوکولدو
توک آغاردی،دیشلر بیر –بیر تؤکولدو
هرنه توخوموشدوم بوتون سؤکولدو
داستان اولدوم دوشدوم دیللرده قالدیم
قاتارلانیب درد جانیما دوزولدو
دونیا ساغلیغیندان الیم اوزولدو
اجل شاختا ووروب تاغیم پوزولدو
لیلاسیز مجنون تک چؤللرده قالدیم
دده کاتیب حال احوالیم پریشان
قولاقلار ائشیتمیر،گرژله ریم دومان
اؤزون منه یار اول ای رحیم-رحمان
یورولموشام یورقون یوللاردا قالدیم
سویوموز
کؤنول دیللر تانیددیرسین سویونو
بیز تورک تورنویوق قوچ اوغلانلییق
بیر کؤکده ن آیریلمیش اون بئش دال بوداق
خزر دنیزینین چئوره یانلی ییق
تورک اوغلویوق بیز ساواسا چیخاندا
ییلدیریملار چارپیپ شیمشک شاخاندا
دوشمن لر کؤکسونه سونگو تاخاندا
قیزمیش قاپلان کیمی های کیرانلی ییق
بوتون تورکلر بیر بیره چاتار
قازان، قیرقیز، چرکس، تورکمن، تاتار
یوردومدا اوستون شاعیرلر یاتار
قاراباغ ، ناخجیوان ، داغیستانلی ییق
کیمسه گیز له دمز تورک آدی ایتمز
تاریخلر یازیسی سیلینمز گئدمز
سؤزو قیسا کسک ،چون سونا یئمز
اینسانلیق بیلن ،بیز اینسانلی ییق
سئوریک وطنی، دینی، تانرینی
کسریک دوشمنین تار تامارینی
آتشه یاکاریق بوتون وارینی
شوکور موسیلمانیق، بیز ایمانلی ییق
موغولدان باشلامیش رومانا قدر
بولغار سوفیادان گیرمانا قدر
تورکیه ایراقدان افغانا قدر
بورادادا آذربایجانلی ییق
اسکی ده ن تانیور دونیالار بیزی
دنیزلر قارالار هاوالار بیزی
هئچ قورخاداماز هارای لار بیزی
گوجلو بیلک لی ییق، ایستی قانلی ییق
دده کاتیب بیز ناموسو آتماریق
اؤلکه میزی یابانجییا ساتماریق
یوردوموزون بیکچی سییق یاتماریق
چیلیک قوللار ایله آرچالانلی ییق
