گؤزه ل اورمو گؤلوم منیم       فرهاد جوانبخت قولنجی

"اورمو گؤلو اول آللاه آد اولسون                         

کؤنلوموزده  دائیم آللاه یاد اولسون                                        

آذربایجان میللتیمیز شاد اولسون

خوش دوشونک خوش چالیشاق خوش بیلک

بیر-بیر ائیله خوش دانیشاق خوش گولک" (دده کاتیب)

اورمو گؤلو، نه گؤزه ل یارینمیسان . نه گؤزه ل خالقیمیزین دیلینده سؤزله رن یئر آچمیسان . بیر اؤزه ل ائلین اوره گی اولوبسان کی اوره گ سیز یاشاماق هئچ اولارمی ؟ یانینداکی آغ دوزلار سنین یاشلی و باش آغارماقین گؤرسه دیر.

سنه تؤکوله ن سولاری دا گؤردوم؛ سئوینمک ده بو قدر؟ ایستمک ده بوقدر؟ داشلی داغلارین اتگینده ییغیلیب ، یوللاری اوستونده کی هر نه ایله ساواشیب و بونا گووه نیرله ر کی سنه چاتاجاق لار.

سنین داشدان اولان عثمان یومراغین ، بیر میللتین وحدت یومراغینین نیمادی دیر.

نئچه میلیون قوللارین لا بیر یاندان قارا دنیزه و بیر یاندان خزر دنیزه یاپیشیسان و اوجا بویون لا ، بو آرانین آیله سینین باش حافیظی سان.

محبت و صفان نه اؤزه ل دیر کی هر یاندان اینسانلاری چئوره یه ن دولدوروسان؟ عشقین نه درین لیک ده دیر کی قلم لرده ، شعیرلرده ، و آشیق لارین سازیندا خوشجا آدین وار؟

دده کاتیب گؤزه لجه دئییب : « بوتون آذربایجان سنین دیر » بوتون آذربایجانداکی یاشییان ائلله ر سنین دیر.میللت اویاقدیر چون سن اویاقسان . بیر قوجامان یاشلی حایات سان کی حایاتی اؤیره نمه گی اؤیره دیرسن . جانا جان ، هارایا هارای ، دوستا آلقیش و دوشمانا قیلینج چکیرسن . دده کاتیب منظومه سینده کی سئوگینی سنده ن باجاردی و خالق ایچینده کی یاییلمیش سؤزله رینی سنین اوچون پایلادی.

آوقان داغی سولارینی سنه آخدیریر تا بلکه بویونو داها آرتیرسین و گؤزه للیک له رین ان یاخشی گؤرسون .

آراز چایی گئده-گئده گؤزو سنده و آرزوسو سنه یئتیرمک دیر .اؤزونو داشدیریر تا بلکه سنه بیر یول آچسین.

اورمو گؤلو،« بالدان شیرین دوزون وار »؛ سنین سویون اؤزگه لره ( انگل لره ) بیر اود کیمی گؤزله رینه سانجی تؤکه ر .آما بیزلره سویون بیر درده درمان علاج دیر ، سیخیلمیش اوره ک لره دایاق دیر ، مملکت عاشیق لارین سئوگیسینی آشکار ائدن چیراغ دیر.

میللت چکه ن شادلیق لاری و آجی لاری سن ده حیس ائدیرسن . چون کی سنه تؤکوله ن چایلار ، همن بو ائلین ایچینده ن کئچیب ، شهرلره و کندلره  آیاق قویوب ، اونلارین او دوروم لاریندان یویوب و سنه چاتدیریرلار.

شیخ صفی الدین اوشاق لیقیندا سنین اوزون گؤردو ، گوجلو هاوان اورگینده قالدی و گنج لیینده همن سنین عطیرلی هاوان لا ، عود ماهنی لارینی چالیردی . آشیق درویش یالنیز سنین بیر قونشو کند لرینده بؤیودو ، آما نئجه کی سن بوتون آذربایجانین کی سان ، سازینین تئللرینین سسی بوتون آذربایجاندا عشق یئلیینن هر قولاقا چاتدی .

یای گلینجه دگرین داها آرتیق لاشیر ، آدین داها یوکسک له شیر، اتگین سئونلریننن داها گؤزه للشیر . وطن ده کی تانیش قوشلار ساغین لا  سولان دولورلار ، سن له گؤروشوب و دؤیوشلره قوت آلیرلار.

کؤچمن قوشلارین سنه چاتان ذوق لارینی کیمسه دانا بیلر؟ همن بو ذوق اوچون دو کی دئییرله ر قوشلار صف له گئدنده توی توتورلار.

اوزون اتگین هر یانادان ایگیدلر بؤیودوبدور ؛ تبریز ده کی مشروطه قورانلار ، اورمیه ده کی قهرمانلار سن له گؤروشوب و اوزون یوللارا آددیم آتدیلار. انزل دکی قولونجولو قاضی بوزقورد ( مللا بوزو) سنین اؤز قوم لارین اوستونده  قدم لرینی آتا آتا ، سن له آند ایچدی کی اجنبی لری یورددان قاچیدماییب سا ، یاتماسین.

دوغرو دور ، تورپاغ سویوق اولار ؛ آما بیز یاشایان تورپاغ گؤر نه قدر ایستی دیر کی بئلنجی اولادلار بارا گتیریب . آللاه آدی دیللرده ، وطن عشقی کؤنوللرده ، داغدان داغا قاچما نه دیر ؟ داغی داغا چالما نه دیر؟ اون سگگیز امپراطورلوق قورانلار بیزیم بو هارای لی تورپاغ دا بؤیوبلر .همن تورپاغ کی سنین تک شیرین- دوزلو سولارینان قاریشلانیب.

نه آه لار چکیب سن ، نه گؤز یاشلار تؤکوب سن ، جیلولارین جینایت لرینی سن یاخین دان گؤروبسن . ماکی نین ، خویون ، سالماسین شهید لرینی سایا بیلدین دا ؟ قولونجونون کارناسی میللتینین آغری سی فاضلا اولماقا گؤره بیر یارا تک شیشیب دیر.اورمیه نین داردان آسیلمیش قادین لارینی ، الده تسبیح قوجالارینی ، گنج لرینی و اوشاق لارینی اونوتمامیبسان کی ؟ سمیتکونون گؤردوک لرینی  یادیندا ساخلامیسان دا ؟ سولدوزون قاراپاپاق میللتینین اوستونه سیلاح چکنلری تانیدین دا؟ بونلارین هامیسینین شاهیدی سن سن .بیر میللتین نیمادی و فرهنگینی دونیالارا چاتدیرانی سن سن .قادیر آللاه سنی گؤزه لجه یارادیب تا بلکه ائلین گؤزه للیک لرنینین آیناسی اولاسان ، بیر بؤیوک عایله نین موحتشم لیگینی بیر ایشیق تک باخیش لارا چاتدیراسان .  پس اؤلمه ، قوروما ، سویون داها درین لشدیر، تاریخ بویو یاشا ، یاشا گؤزه ل اورمو گؤلوم منیم ...

         "اورمو گؤلو شفقلرین سؤنمه سین

زامان چرخی ضرری ین چؤنمه سین

اؤزگه قوشو سولاریان قونماسین

ائللر گلیب دؤنوب گئدسین دال با دال

سن حئییف سن گئتمه - گئتمه هله قال" (دده کاتیب)

منبع(قایناق):هفته نامه فردای ما (صاباحیمیز) شماره ۳۱۰ ، تاریخ ۱۸ خرداد ۱۳۸۸